Narmadashtakam

శ్రీమదాద్య-శంకరాచార్య-విరచిత-నర్మదాష్టకమ్ | సబిన్దుసిన్ధుసుస్ఖలత్తరఙ్గభఙ్గరఞ్జితం ద్విషత్సుపాపజాతజాతకారివారిసంయుతమ్। కృతాన్తదూతకాలభూతభీతిహారివర్మదే త్వదీయపాదపఙ్కజం నమామి దేవి నర్మదే॥౧॥ త్వదమ్బులీనదీనమీనదివ్యసమ్ప్రదాయకం కలౌమలౌఘభారహారిసర్వతీర్థనాయకమ్। సుమచ్ఛకచ్ఛనక్రచక్రచక్రవాకశర్మదే త్వదీయపాదపఙ్కజం నమామి దేవి నర్మదే॥౨॥ మహాగభీరనీరపూరపాపధూతభూతలం నమత్సమస్తపాతకారిదారితాపదాచలమ్। జగల్లయే మహాభయే మృకణ్డుసూనుహర్మ్యదే త్వదీయపాదపఙ్కజం నమామి దేవి నర్మదే॥౩॥ గతం తదైవ మే భయం త్వదమ్బు వీక్షితం యదా మృకణ్డుసూనుశౌనకాసురారిసేవిసర్వదా। పునర్భవాబ్ధిజన్మజం భవాబ్ధిదుఃఖవర్మదే త్వదీయపాదపఙ్కజం నమామి దేవి నర్మదే॥౪॥ అలక్షలక్షకిన్నరామరాసురాదిపూజితం సులక్షనీరతీరధీరపక్షిలక్షకూజితమ్। వసిష్ఠశిష్టపిప్పలాదకర్దమాదిశర్మదే త్వదీయపాదపఙ్కజం నమామి దేవి నర్మదే॥౫॥ సనత్కుమారనాచికేతకశ్యపాత్రిషట్పదైః ధృతం స్వకీయమానసేషు నారదాదిషట్పదైః। రవీన్దురన్తిదేవదేవరాజకర్మశర్మదే త్వదీయపాదపఙ్కజం నమామి దేవి నర్మదే॥౬॥ అలక్షలక్షలక్షపాపలక్షసారసాయుధం తతస్తు జీవజన్తుతన్తు భుక్తిముక్తిదాయకమ్। విరిఞ్చివిష్ణుశంకరస్వకీయధామవర్మదే త్వదీయపాదపఙ్కజం నమామి దేవి నర్మదే॥౭॥ అహోఽమృతం స్వనం శ్రుతం మహేశకేశజాతటే కిరాతసూతవాడబేషు పణ్డితే శఠే నటే। దురన్తపాపతాపహారిసర్వజన్తుశర్మదే త్వదీయపాదపఙ్కజం నమామి దేవి నర్మదే॥౮॥ ఇదం తు నర్మదాష్టకం త్రికాలమేవ యే సదా పఠన్తి తే నిరన్తరం న యాన్తి దుర్గతిం కదా। సులభ్యదేహదుర్లభం మహేశధామగౌరవం పునర్భవా నరా న వై విలోకయన్తి రౌరవమ్॥౯॥ ఇతి శ్రీమద్ ఆద్యశంకరాచార్యవిరచితం నర్మదాష్టకం సమ్పూర్ణమ్ |నర్మదే హర | నర్మదే హర | నర్మదే హర ||