Rama Raksha Stotram

॥ శ్రీ గణేశాయ నమః ॥ అస్య శ్రీరామరక్షాస్తోత్రమన్త్రస్య । బుధకౌశికఋషిః । శ్రీసీతారామచన్ద్రో దేవతా । అనుష్టుప్ ఛ్న్దః । సీతా శక్తిః । శ్రీమద్ హనుమాన్ కీలకమ్ । శ్రీరామచన్ద్రప్రీత్యర్థే జపే వినియోగః । అథ ధ్యానమ్ । ధ్యాయేదాజానుబాహుం ధృతశరధనుషం । బద్ధపద్మాసనస్థమ్ । పీతం వాసో వసానం నవకమలదలస్పర్ధినేత్రం ప్రసన్నమ్ । వామాఙ్కారూఢసీతాముఖకమలమిలల్లోచనం నీరదాభమ్ । నానాలఙ్కారదీప్తం దధతమురుజటామణ్డనం రామచన్ద్రమ్ ॥ ఇతి ధ్యానమ్ । చరితం రఘునాథస్య శతకోటిప్రవిస్తరమ్ । ఏకైకమక్షరం పుంసాం మహాపాతకనాశనమ్ ॥ ౧ ॥ ధ్యాత్వా నీలోత్పలశ్యామం రామం రాజీవలోచనమ్ । జానకీలక్ష్మణోపేతం జటాముకుటమణ్డితమ్ ॥ ౨ ॥ సాసితూణధనుర్బాణపాణిం నక్తంచరాన్తకమ్ । స్వలీలయా జగత్త్రాతుమావిర్భూతమజం విభుమ్ ॥ ౩॥ రామరక్షామ్ పఠేత్ ప్రాజ్ఞః పాపఘ్నీం సర్వకామదామ్ । శిరో మే రాఘవః పాతు భాలం దశరథాత్మజః ॥ ౪ ॥ కౌసల్యేయో దృశౌ పాతు విశ్వామిత్రప్రియః శ్రుతీ । ఘ్రాణం పాతు మఖత్రాతా ముఖం సౌమిత్రివత్సలః ॥ ౫ ॥ జిహ్వాం విద్యానిధిః పాతు కణ్ఠం భరతవన్దితః । స్కన్ధౌ దివ్యాయుధః పాతు భుజౌ భగ్నేశకార్ముకః ॥ ౬ ॥ కరౌ సీతాపతిః పాతు హృదయం జామదగ్న్యజిత్ । మధ్యం పాతు ఖరధ్వంసీ నాభిం జామ్బవదాశ్రయః ॥ ౭ ॥ సుగ్రీవేశః కటీ పాతు సక్థినీ హనుమత్ప్రభుః । ఊరూ రఘూత్తమః పాతు రక్షఃకులవినాశకృత్ ॥ ౮ ॥ జానునీ సేతుకృత్ పాతు జఙ్ఘే దశముఖాన్తకః । పాదౌ విభీషణశ్రీదః పాతు రామోఽఖిలం వపుః ॥ ౯ ॥ ఏతాం రామబలోపేతాం రక్షాం యః సుకృతీ పఠేత్ । స చిరాయుః సుఖీ పుత్రీ విజయీ వినయీ భవేత్ ॥ ౧౦ ॥ పాతాలభూతలవ్యోమ చారిణశ్ఛద్మచారిణః । న ద్రష్టుమపి శక్తాస్తే రక్షితం రామనామభిః ॥ ౧౧ ॥ రామేతి రామభద్రేతి రామచన్ద్రేతి వా స్మరన్ । నరో న లిప్యతే పాపైర్భుక్తిం ముక్తిం చ విన్దతి ।। ౧౨ ॥ జగజ్జైత్రేకమన్త్రేణ రామనామ్నాభిరక్షితమ్ । యః కన్ఠే ధారయేత్తస్య కరస్థాః సర్వసిధ్దయః ॥ ౧౩ ॥ వజ్రపఞ్జరనామేదమం యో రామకవచం స్మరేత్ । అవ్యాహతాజ్ఞః సర్వత్ర లభతే జయమఙ్గలమ్ ॥ ౧౪ ॥ ఆదిష్టవాన్ యథా స్వప్నే రామరక్షామిమాం హరః । తథా లిఖితవాన్ ప్రాతః ప్రబుద్ధో బుధకౌశికః ॥ ౧౫ ॥ ఆరామః కల్పవృక్షాణాం విరామః సకలాపదామ్ । అభిరామస్త్రిలోకానాం రామః శ్రీమాన్ స నః ప్రభుః ॥ ౧౬ ॥ తరుణౌ రూపసంపన్నౌ సుకుమారౌ మహాబలౌ । పుణ్డరీక విశాలాక్షౌ చీరకృష్ణాజినామ్బరౌ ॥ ౧౭ ॥ ఫలమూలాశినౌ దాన్తౌ తాపసౌ బ్రహ్మచారిణౌ । పుత్రౌ దశరథస్యైతౌ భ్రాతరౌ రామలక్ష్మణౌ ॥ ౧౮ ॥ శరణ్యౌ సర్వసత్వానాం శ్రేష్ఠౌ సర్వధనుష్మతామ్ । రక్షః కులనిహన్తారౌ త్రాయేతాం నో రఘూత్తమౌ ॥ ౧౯ ॥ ఆత్తసజ్జధనుషావిషుస్పృశావక్షయాశుగనిషఙ్గసఙ్గినౌ । రక్షణాయ మమ్ రామలక్ష్మణావగ్రతః పథి సదైవ గచ్ఛతామ్ ॥ ౨౦ ॥ సంనద్ధః కవచీ ఖడ్గీ చాపబాణధరో యువా । గచ్ఛన్ మనోరథోఽస్మాకం రామః పాతు సలక్ష్మణః ॥ ౨౧ ॥ రామో దాశరథిః శూరో లక్ష్మణానుచరో బలీ । కాకుత్స్థః పురుషః పూర్ణః కౌసల్యేయో రఘూత్తమః ॥ ౨౨ ॥ వేదాన్తవేద్యో యజ్ఞేశః పురాణపురుషోత్తమః । జానకీవల్లభః శ్రీమానప్రమేయపరాక్రమః ॥ ౨౩ ॥ ఇత్యేతాని జపేన్నిత్యం మద్భక్తః శ్రద్ధయాన్వితః । అశ్వమేధాధికం పుణ్యం సమ్ప్రాప్నోతి న సంశయః ॥ ౨౪ ॥ రామందూర్వాదలశ్యామం పద్మాక్షం పీతవాససమ్ । స్తువన్తి నామభిర్దివ్యైర్న తే సంసారిణో నరః ॥ ౨౫ ॥ రామం లక్ష్మణపూర్వజమ్ రఘువరం సీతాపతిం సున్దరమ్ । కాకుత్స్థం కరుణార్ణవం గుణనిధిం విప్రప్రియం ధార్మికమ్ ॥ రాజేన్ద్రం సత్యసన్ధం దశరథతనయం శ్యామలం శాన్తమూర్తిమ్ । వన్దే లోకాభిరామం రఘుకులతిలకమ్ రాఘవం రావణారిమ్ ॥ ౨౬ ॥ రామాయ రామభద్రాయ రామచన్ద్రాయ వేధసే । రఘునాథాయ నాథాయ సీతాయాః పతయే నమః ॥ ౨౭ ॥ శ్రీరామ రామ రఘునన్దన రామ రామ । శ్రీరామ రామ భరతాగ్రజ రామ రామ ॥ శ్రీరామ రామ రణకర్కశ రామ రామ । శ్రీరామ రామ శరణం భవ రామ రామ ॥ ౨౮ ॥ శ్రీరామచన్ద్రచరణౌ మనసా స్మరామి । శ్రీరామచన్ద్రచరణౌ వచసా గృణామి ॥ శ్రీరామచన్ద్రచరణౌ శిరసా నమామి । శ్రీరామచన్ద్రచరణౌ శరణం ప్రపద్యే ॥ ౨౯ ॥ మాతా రామో మత్పితా రామచన్ద్రః । స్వామీ రామో మత్సఖా రామచన్ద్రః ॥ సర్వస్వం మే రామచన్ద్రో దయాలుః । నాన్యం జానే నైవ జానే న జానే ॥ ౩౦ ॥ దక్షిణే లక్ష్మణో యస్య వామే తు జనకాత్మజా । పురతో మారుతిర్యస్య తం వన్దే రఘునన్దనమ్ ॥ ౩౧ ॥ లోకాభిరామం రణరఙ్గధీరం రాజీవనేత్రం రఘువంశనాథమ్ । కారుణ్యరూపం కరుణాకరం తం శ్రీరామచన్ద్రం శరణం ప్రపద్యే ॥ ౩౨ ॥ మనోజవం మారుతతుల్యవేగం జితేన్ద్రియం బుద్ధిమతాం వరిష్ఠమ్ । వాతాత్మజం వానరయూథముఖ్యం శ్రీరామదూతం శరణం ప్రపద్యే ॥ ౩౩ ॥ కూజన్తం రామరామేతి మధురం మధురాక్షరమ్ । ఆరుహ్య కవితాశాఖాం వన్దే వాల్మీకికోకిలమ్ ॥ ౩౪ ॥ ఆపదామపహర్తారం దాతారం సర్వసంపదామ్ । లోకాభిరామం శ్రీరామం భూయో భూయో నమామ్యహమ్ ॥ ౩౫ ॥ భర్జనం భవబీజానామర్జనం సుఖసంపదామ్ । తర్జనం యమదూతానాం రామరామేతి గర్జనమ్ ॥ ౩౬ ॥ రామో రాజమణిః సదా విజయతే రామం రమేశం భజే । రామేణాభిహతా నిశాచరచమూ రామాయ తస్మై నమః ॥ రామాన్నాస్తి పరాయణం పరతరం రామస్య దాసోఽస్మ్యహమ్ । రామే చిత్తలయః సదా భవతు మే భో రామ మాముద్ధర ॥ ౩౭ ॥ రామరామేతి రామేతి రమే రామే మనోరమే । సహస్త్రనామతత్తుల్యం రామనామ వరాననే ॥ ౩౮ ॥ ఇతి శ్రీబుధకౌశికవిరచితం శ్రీరామరక్షాస్త్రోత్రం సమ్పూర్ణమ్ । ॥ శ్రీసీతారామచన్ద్రార్పణమస్తు ॥ ॥ శుభం భవతు ॥ ॥ ఓం శాన్తిః శాన్తిః శాన్తిః ॥