Sharada Pancharatna Stuti

విద్యాముద్రాక్షమాలాఽమృతకలశకరా కోటిసూర్యప్రకాశా జాయా పద్మోఫ़్భవస్య ప్రణతజనతతేః సర్వమిష్టం దిశన్తీ । ఇన్ద్రోపేన్ద్రాదివన్ద్యా త్రిభువనజననీ వాక్సవిత్రీ శరణ్యా సేయం శ్రీశారదామ్బాం సకలసుఖకరీ మఙ్గలాని ప్రదద్యాత్ ॥ ॥ ఇతి ధ్యానమ్॥ శ్రీమచ్ఛఙ్కరదేశికేన్ద్రరచితే తుఙ్గాపగాతీరగే శృఙ్గేర్యాఖ్యపురస్థితే సువిమలే సన్మౌనిసంసేవితే । పీఠే తాం రవికోటిదీప్తిసహితాం రారాజమానాం శివాం రాజీవాక్షముఖామరార్చితపదాం వన్దే సదా శారదామ్ ॥౧॥ పాదానమ్రజనార్తినాశనిపుణాం నాదానుసన్ధాయినీం వేదాన్తప్రతిపాద్యమానవిభవాం వాదాదిశక్తిప్రదామ్ । విద్యాకల్పలతాం చతుర్ముఖముఖామ్భోజాతసూర్యాయితాం విద్యాతీర్థగురూత్తమైరహరహః సంసేవ్యమానాం భజే ॥౨॥ ఈషత్స్మేరముఖామ్బుజాం కుచభరానమ్రాం త్రిలోకావనీం దైత్యవ్రాతవినాశినీం కుచజితప్రావృట్పయోదాం శివామ్ । సంసారార్ణవమగ్నదీనజనతాసన్తాపసన్నాశినీం వన్దే తాం శుభదామనన్యశరణః స్వాన్తే సదా శారదామ్ ॥౩॥ కారుణ్యామృతవారిరాశిమనిశం కేయూరహారైర్వృతాం కామారేః సహజాం కరాబ్జవిలసత్కీరాం కుబేరార్చితామ్ । కామక్రోధముఖారివర్గశమనీం కైవల్యసమ్పత్ప్రదాం కఞ్జోద్భూతమనః ప్రియాం హృది భజే భక్త్యా సదా శారదామ్ ॥౪॥ నిత్యాఽనిత్యవివేకదాననిపుణాం స్తుత్యాం ముకున్దాదిభిః యత్యాకారశశాఙ్కమౌలివినుతాం సత్యాపితస్వాశ్రవామ్ । నత్యా కేవలమేవ తుష్టహృదయాం త్యక్త్వాఽన్యదేవానహం భక్త్యా మే హృదయామ్బుజేఽనవరతం వన్దే సదా శారదామ్ ॥౫॥ ॥ ఇతి శ్రీశారదాపఞ్చరత్నస్తుతిః॥