Gopala Vimshati

.. gopālaviṃśatistotram .. śrīmān veṃkaṭanāthāryaḥ kavitārkikakesarī vedāntācāryavaryo me sannidhattāṃ sadā hṛdi | vande vṛndāvanacaraṃ valavvījanavallabham jayantīsambhavaṃ dhāma vaijayantīvibhūṣaṇam || 1|| vācaṃ nijāṅkarasikāṃ prasamīkṣamāṇo vaktrāravindaviniveśitapāṃcajanyaḥ | varṇaḥ trikoṇarūcire varapuṇḍarīke baddhāsano jayati vallavacakravartī || 2|| āmnāyagandharuditasphuritādharoṣṭham āsrāvilekṣaṇamanukṣaṇamandahāsam | gopālaḍimbhavapuṣaṃ kuhanā jananyāḥ prāṇastanandhayamavaimi paraṃ pumāṃsam || 3|| āvirbhavatvanibhṛtābharaṇaṃ purastāt ākuṃcitaikacaraṇa nibhṛhitānyapādam | dadhnānibaddhamukhareṇa nibaddhatālaṃ nāthasya nandabhavane navanītanāṭyam || 4|| kundaprasūnaviśadairdaśanaiścartubhiḥ saṃdaśya māturaniśaṃ kucacūcukāgram | nandasya vaktramavalokayato murārer- mandasthitaṃ mamamanīṣitamātanotu || 5|| hartuṃ kumbhe vinihitakaraḥ svādu haiyaṅgavīnaṃ dṛṣṭvā dāmagrahaṇacaṭulāṃ mātaraṃ jātaroṣām | pāyādīṣatpracalitapadau nāpagacchanna tiṣṭhan mithyāgopaḥ sapadi nayane mīlayan viśvagoptā || 6|| vrajayoṣidapāṅga vedhanīyaṃ mathurābhāgyamananyabhogyamīḍe | vasudevavadhū stanandhayaṃ tad- kimapi brahma kiśorabhāvadṛśyam || 8|| parivartitakandharaṃ bhayena smitaphullādharapallavaṃ smarāmi | viṭapitvanirāsakaṃ kayościd- vipulolūkhalakarṣakaṃ kumāram || 9|| nikaṭeṣu niśāmayāmi nityaṃ nigamāntairadhunā'pi mṛgyamāṇam | yamalārjunadṛṣṭabālakeliṃ yamunāsākṣikayauvanaṃ yuvānam || 10|| padavīmadavīyasīṃ vimukte- raṭavīṃ sampadambu vāhayantīm | arūṇādharasābhilāṣavaṃśāṃ karūṇāṃ kāraṇamānuṣīṃ bhajāmi || 11|| animeṣaniveṣṇīyamakṣṇo- rajahadyauvanamāvirastu citte | kalahāyitakuntalaṃ kalāpaiḥ karūṇonmādakavigrahaṃ maho me || 12|| anuyāyimanojñavaṃśanālai- ravatu sparśitavallavīvimohaiḥ | anaghasmitaśītalairasau mām anukampāsaridambujairapāṅgaiḥ || 13|| adharāhitacārūvaṃśanālā makuṭālambimayūrapiñcchamālāḥ | harinīlaśilāvibhaṅganīlāḥ pratibhāḥ santu mamāntimaprayāṇe || 14|| akhilānavalokayāmi kālān mahilādīnabhujāntarasyūnaḥ | abhilāṣapadaṃ vrajāṅganānām abhilākramadūramābhirūpyam || 15|| mahase mahitāya maulinā vinatenāñjalimañjanatviṣe | kalayāmi vimugdhavallavī- valayābhāṣitamañjuveṇave || 16|| jayatu lalitavṛttiṃ śikṣito vallavīnāṃ śithilavalayaśiñjāśītalairhastatālaiḥ | akhilabhuvanarakṣāgopaveśasya viṣṇo- radharamaṇisudhāyāmaṃśavān vaṃśanālaḥ || 17|| citrākalpaḥ śravasi kalayallāṅgalīkarṇapūraṃ barhottaṃsasphuritacikuro bandhujīvaṃ dadhānaḥ | guṃjābaddhāmurasi lalitāṃ dhārayan hārayaṣṭiṃ gopastrīṇāṃ jayati kitavaḥ ko'pi kaumārahārī || 18|| līlāyaṣṭiṃ karakisalaye dakṣiṇe nyasta dhanyā- maṃse devyāḥ pulakarucire sanniviṣṭānyabāhuḥ | meghaśyāmo jayati lalito mekhalādattaveṇu- rguñjāpīḍasphuritacikuro gopakanyābhujaṅgaḥ || 19|| pratyālīḍhasthitiṃadhigatāṃ prāptagāḍhāṅkapālīṃ paścādīṣanmilitanayanāṃ preyasīṃ prekṣamāṇaḥ | bhastrāyantrapraṇihitakaro bhaktajīvāturavyād vārikrīḍānibiḍavasano vallavīvallabho naḥ || 20|| vāso hṛtvā dinakarasutāsannidhau vallavīnāṃ līlāsmero jayati lalitāmāsthitaḥ kundaśākhām | savrīḍābhistadanu vasane tābhirabhyarthyamāne kāmī kaścitkarakamalayorañjaliṃ yācamānaḥ || 21|| ityananyamanasā vinirmitāṃ veṃkaṭeśakavinā stutiṃ paṭhan | divyaveṇurasikaṃ samīkṣate daivataṃ kimapi yauvatapriyam || 22|| || iti gopālaviṃśatistotraṃ sampūrṇam ||