Jatayu Kruta Rama Stotram

jaṭāyuruvāca agaṇitaguṇamaprameyamādyaṃ sakalajagatsthitisaṃyamādihetum | uparamaparamaṃ parātmabhūtaṃ satatamahaṃ praṇato'smi rāmacandram || 1|| niravadhisukhamindirākaṭākṣaṃ kṣapitasurendracaturmukhādiduḥkham | naravaramaniśaṃ nato'smi rāmaṃ varadamahaṃ varacāpabāṇahastam || 2|| tribhuvanakamanīyarūpamīḍyaṃ raviśatabhāsuramīhitapradānam | śaraṇadamaniśaṃ surāgamūle kṛtanilayaṃ raghunandanaṃ prapadye || 3|| bhavavipinadavāgnināmadheyaṃ bhavamukhadaivatadaivataṃ dayālum | danujapatisahasrakoṭināśaṃ ravitanayāsadṛśaṃ hariṃ prapadye || 4|| aviratabhavabhāvanātidūraṃ bhavavimukhairmunibhiḥ sadaiva dṛśyam | bhavajaladhisutāraṇāṅghripotaṃ śaraṇamahaṃ raghunandanaṃ prapadye || 5|| giriśagirisutāmanonivāsaṃ girivaradhāriṇamīhitābhirāmam | suravaradanujendrasevitāṅghriṃ suravaradaṃ raghunāyakaṃ prapadye || 6|| paradhanaparadāravarjitānāṃ paraguṇabhūtiṣu tuṣṭamānasānām | parahitaniratātmanāṃ susevyaṃ raghuvaramambujalocanaṃ prapadye || 7|| smitaruciravikāsitānanābjamatisulabhaṃ surarājanīlanīlam | sitajalaruhacārunetraśobhaṃ raghupatimīśagurorguruṃ prapadye || 8|| harikamalajaśambhurūpabhedāttvamiha vibhāsi guṇatrayānuvṛttaḥ | raviriva jalapūritodapātreṣvamarapatistutipātramīśamīḍe || 9|| ratipatiśatakoṭisundarāṅgaṃ śatapathagocarabhāvanāvidūram | yatipatihṛdaye sadā vibhātaṃ raghupatimārtiharaṃ prabhuṃ prapadye || 10|| ityevaṃ stuvatastasya prasanno'bhūdraghūttamaḥ | uvāca gaccha bhadraṃ te mama viṣṇoḥ paraṃ padam || 11|| śṛṇoti ya idaṃ stotraṃ likhedvā niyataḥ paṭhet | sa yāti mama sārūpyaṃ maraṇe matsmṛtiṃ labhet || 12|| iti rāghavabhāṣitaṃ tadā śrutavān harṣasamākulo dvijaḥ || raghunandanasāmyamāsthitaḥ prayayau brahmasupūjitaṃ padam || 13|| || iti śrīmadadhyātmarāmāyaṇe araṇyakāṇḍe'ṣṭame sarge jaṭāyukṛtaṃ śrīrāmastotra ||