Narasimha Stotram

śrī gaṇeśāya namaḥ | brahmovāca | nato'smyanantāya durantaśaktaye vicitravīryāya pavitrakarmaṇe | viśvasya sargasthitisaṃyamānguṇaiḥ svalīlayā sandadhate'vyayātmane || 1|| śrīrudra uvāca | kopakālo yugāntaste hato'yamasuro'lpakaḥ | tatsutaṃ pāhyupasṛtaṃ bhaktaṃ te bhaktavatsala || 2|| indra uvāca | pratyānītāḥ parama bhavatā trāyatāṃ naḥ svabhāgā daityākrāntaṃ hṛdayakamalaṃ tvadgṛhaṃ pratyabodhi | kālagrastaṃ kiyadidamaho nātha śuśrūṣatāṃ te muktisteṣāṃ na hi bahumatā nārasiṃhāparaiḥ kim || 3|| ṛṣaya ūcuḥ | tvaṃ nastapaḥ paramamāttha yadātmatejo yenedamādipuruṣātmagataṃ sasarja | tadvipraluptamamunādya śaraṇyapāla rakṣāgṛhītavapuṣā punaranvamaṃsthāḥ || 4|| pitara ūcuḥ | śrāddhāni no'dhibubhuje prasabhaṃ tanūjairdattāni tīrthasamaye'pyapibattilāmbu | tasyodarānnakhavidīrṇavapādya ārcchattasmai namo nṛharaye'khila dharmagoptre || 5|| siddhā ūcuḥ | yo no gatiṃ yogasiddhāmasādhurahāraṣīdyogatapobalena | nānādarpaṃ taṃ nakhairnirdadāra tasmai tubhyaṃ praṇatāḥ smo nṛsiṃha || 6|| vidyādharā ūcuḥ | vidyāṃ pṛthagdhāraṇayā'nurāddhāṃ nyaṣedhadajño balavīryadṛptaḥ | sa yena saṃkhye paśubaddhatastaṃ māyānṛsiṃhaṃ praṇatāḥ sma nityam || 7|| nāgā ūcuḥ | yena pāpena ratnāni strīratnāni hṛtāni naḥ | tadvakṣaḥpāṭanenāsāṃ dattānanda namo'stu te || 8|| manava ūcuḥ | manavo vayaṃ tava nideśakāriṇo ditijena deva paribhūtasetavaḥ | bhavatā khalaḥ sa upasaṃhṛtaḥ prabho karavāma te kimanuśādhi kiṅkarān || 9|| prajāpataya ūcuḥ | prajeśā vayaṃ te pareśābhisṛṣṭā na yena prajā vai sṛjāmo niṣiddhāḥ | sa eṣa tvayā bhinnavakṣānuśete jaganmaṅgalaṃ sattvamūrte'vahāraḥ || 10|| gandharvā ūcuḥ | vayaṃ vibho te naṭanāṭyagāyakā yenātmasādvīryabalaujasā kṛtāḥ | sa eṣa nīto bhavatā daśāmimāṃ kimutpathasthaḥ kuśalāya kalpate || 11|| cāraṇā ūcuḥ | hare tavāṃgghripaṅkajaṃ bhavāpavargamāśritāḥ | yadeva sādhu hṛcchayastvayā'suraḥ samāpitaḥ || 12|| yakṣā ūcuḥ | vayamanucaramukhyāḥ karmabhiste manojñaista iha ditisutena prāpitā vāhakatvam | sa tu janaparitāpaṃ tatkṛtaṃ jānatā te narahara upanītaḥ pañcatāṃ pañcaviṃśaḥ || 13|| kimpuruṣā ūcuḥ | vayaṃ kimpuruṣāstvaṃ tu mahāpuruṣa īśvara | ayaṃ kupuruṣo naṣṭo dhikkṛtaḥ sādhubhiryadā || 14|| vaitālikā ūcuḥ | sabhāsu satreṣu tavāmalaṃ yaśo gītvā saparyāṃ mahatīṃ labhāmahe | yastāṃ vyanaiṣīdbhṛśameṣa durjano diṣṭyā hataste bhagavanyathāmayaḥ || 15|| kinnarā ūcuḥ | vayamīśa kinnaragaṇāstavānugā ditijena viṣṭimamunā'nukāritāḥ | bhavatā hare sa vṛjino'vasādito narasiṃha nātha vibhavāya no bhava || 16|| viṣṇupārṣadā ūcuḥ | adyaitaddharinararūpamadbhutaṃ te dṛṣṭaṃ naḥ śaraṇada sarvalokaśarma | so'yaṃ te vidhikara īśa vipraśaptastasyedaṃ nidhanamanugrahāya vidmaḥ || 17|| || iti śrīmadbhāgavatāntargate saptamaskandhe'ṣṭamadhyāye nṛsiṃhastotraṃ sampūrṇam ||