Narayana Kavacham

rājovāca | yayā guptaḥ sahasrākṣaḥ savāhānripusainikān | krīḍanniva vinirjitya trilokyā bubhuje śriyam || 1|| bhagavaṃstanmamākhyāhi varma nārāyaṇātmakam | yathā''tatāyinaḥ śatrūn yena gupto'jayanmṛdhe || 2|| śrīśuka uvāca | vṛtaḥ purohitastvāṣṭro mahendrāyānupṛcchate | nārāyaṇākhyaṃ varmāha tadihaikamanāḥ śṛṇu || 3|| viśvarūpa uvāca | dhautāṇghripāṇirācamya sapavitra udaṇmukhaḥ | kṛtasvāṇgakaranyāso mantrābhyāṃ vāgyataḥ śuciḥ || 4|| nārāyaṇamayaṃ varma sannahyedbhaya āgate | pādayorjānunorūrvorudare hṛdyathorasi || 5|| mukhe śirasyānupūrvyādoṃkārādīni vinyaset | oṃ namo nārāyaṇāyeti viparyayamathāpi vā || 6|| karanyāsaṃ tataḥ kuryāddvādaśākṣaravidyayā | praṇavādiyakārāntamaṇgulyaṇguṣṭhaparvasu || 7|| nyaseddhṛdaya oṃkāraṃ vikāramanu mūrdhani | ṣakāraṃ tu bhruvormadhye ṇakāraṃ śikhayā diśet || 8|| vekāraṃ netrayoryuJṇjyānnakāraṃ sarvasandhiṣu | makāramastramuddiśya mantramūrtirbhavedbudhaḥ || 9|| savisargaṃ phaḍantaṃ tat sarvadikṣu vinirdiśet | oṃ viṣṇave nama iti || 10|| ātmānaṃ paramaṃ dhyāyeddhyeyaṃ ṣaṭśaktibhiryutam | vidyātejastapomūrtimimaṃ mantramudāharet || 11|| oṃ harirvidadhyānmama sarvarakṣāṃ nyastāṇghripadmaḥ patagendrapṛṣṭhe | darāricarmāsigadeṣucāpa- pāśāndadhāno'ṣṭaguṇo'ṣṭabāhuḥ || 12|| jaleṣu māṃ rakṣatu matsyamūrti- ryādogaṇebhyo varuṇasya pāśāt | sthaleṣu māyāvaṭuvāmano'vyāt trivikramaḥ khe'vatu viśvarūpaḥ || 13|| durgeṣvaṭavyājimukhādiṣu prabhuḥ pāyānnṛsiṃho'surayūthapāriḥ | vimuJṇcato yasya mahāṭṭahāsaṃ diśo vinedurnyapataṃśca garbhāḥ || 14|| rakṣatvasau mādhvani yajñakalpaḥ svadaṃṣṭrayonnītadharo varāhaḥ | rāmo'drikūṭeṣvatha vipravāse salakṣmaṇo'vyādbharatāgrajo'smān || 15|| māmugradharmādakhilātpramādā- nnārāyaṇaḥ pātu naraśca hāsāt | dattastvayogādatha yoganāthaḥ pāyādguṇeśaḥ kapilaḥ karmabandhāt || 16|| sanatkumāro'vatu kāmadevā- ddhayaśīrṣā māṃ pathi devahelanāt | devarṣivaryaḥ puruṣārcanāntarāt kūrmo harirmāṃ nirayādaśeṣāt || 17|| dhanvantarirbhagavānpātvapathyā- ddvandvādbhayādṛṣabho nirjitātmā | yajñaśca lokādavatāJṇjanāntā- dbalo gaṇātkrodhavaśādahīndraḥ || 18|| dvaipāyano bhagavānaprabodhā- dbuddhastu pākhaṇḍagaṇapramādāt | kalkiḥ kaleḥ kālamalātprapātu dharmāvanāyorukṛtāvatāraḥ || 19|| māṃ keśavo gadayā prātaravyā- dgovinda āsaṇgavamāttaveṇuḥ | nārāyaṇaḥ prāhṇa udāttaśakti- rmadhyandine viṣṇurarīndrapāṇiḥ || 20|| devo'parāhṇe madhuhogradhanvā sāyaṃ tridhāmāvatu mādhavo mām | doṣe hṛṣīkeśa utārdharātre niśītha eko'vatu padmanābhaḥ || 21|| śrīvatsadhāmāpararātra īśaḥ pratyuṣa īśo'sidharo janārdanaḥ | dāmodaro'vyādanusandhyaṃ prabhāte viśveśvaro bhagavān kālamūrtiḥ || 22|| cakraṃ yugāntānalatigmanemi bhramatsamantādbhagavatprayuktam | dandagdhi dandagdhyarisainyamāśu kakṣaṃ yathā vātasakho hutāśaḥ || 23|| gade'śanisparśanavisphuliṇge niṣpiṇḍhi niṣpiṇḍhyajitapriyāsi | kūṣmāṇḍavaināyakayakṣarakṣo- bhūtagrahāṃścūrṇaya cūrṇayārīn || 24|| tvaṃ yātudhānapramathapretamātṛ- piśācavipragrahaghoradṛṣṭīn | darendra vidrāvaya kṛṣṇapūrito bhīmasvano'rehṛ|rdayāni kampayan || 25|| tvaṃ tigmadhārāsivarārisainya- mīśaprayukto mama chindhi chindhi | cakṣūṃṣi carmaJṇchatacandra chādaya dviṣāmaghonāṃ hara pāpacakṣuṣām || 26|| yanno bhayaṃ grahebhyo'bhūtketubhyo nṛbhya eva ca | sarīsṛpebhyo daṃṣṭribhyo bhūtebhyoṃ'hobhya vā || 27 || sarvāṇyetāni bhagavannāmarūpāstrakīrtanāt | prayāntu saṃkṣayaṃ sadyo ye naḥ śreyaḥpratīpakāḥ || 28|| garuḍo bhagavān stotrastobhaśchandomayaḥ prabhuḥ | rakṣatvaśeṣakṛcchrebhyo viṣvaksenaḥ svanāmabhiḥ || 29 || sarvāpadbhyo harernāmarūpayānāyudhāni naḥ | buddhīndriyamanaḥprāṇānpāntu pārṣadabhūṣaṇāḥ || 30|| yathā hi bhagavāneva vastutaḥ sadasacca yat | satyenānena naḥ sarve yāntu nāśamupadravāḥ || 31|| yathaikātmyānubhāvānāṃ vikalparahitaḥ svayam | bhūṣaṇāyudhaliṇgākhyā dhatte śaktīḥ svamāyayā || 32|| tenaiva satyamānena sarvajño bhagavān hariḥ | pātu sarvaiḥ svarūpairnaḥ sadā sarvatra sarvagaḥ || 33|| vidikṣu dikṣūrdhvamadhaḥ samantā- dantarbahirbhagavānnārasiṃhaḥ | prahāpayaṃ|clokabhayaṃ svanena svatejasā grastasamastatejāḥ || 34|| maghavannidamākhyātaṃ varma nārāyaṇātmakam | vijeṣyasyaJṇjasā yena daṃśito'surayūthapān || 35|| etaddhārayamāṇastu yaṃ yaṃ paśyati cakṣuṣā | padā vā saṃspṛśetsadyaḥ sādhvasātsa vimucyate || 36|| na kutaścidbhayaṃ tasya vidyāṃ dhārayato bhavet | rājadasyugrahādibhyo vyāghrādibhyaśca karhicit || 37|| imāṃ vidyāṃ purā kaścitkauśiko dhārayan dvijaḥ | yogadhāraṇayā svāṇgaṃ jahau sa marudhanvani || 38|| tasyopari vimānena gandharvapatirekadā | yayau citrarathaḥ strībhirvṛto yatra dvijakṣayaḥ || 39 || gaganānnyapatatsadyaḥ savimāno hyavākṣirāḥ | sa vālakhilyavacanādasthīnyādāya vismitaḥ | prāsya prācīsarasvatyāṃ snātvā dhāma svamanvagāt || 40|| śrīśuka uvāca | ya idaṃ śṛṇuyātkāle yo dhārayati cādṛtaḥ | taṃ namasyanti bhūtāni mucyate sarvato bhayāt || 41|| etāṃ vidyāmadhigato viśvarūpācchatakratuḥ | trailokyalakṣmīṃ bubhuje vinirjitya mṛdhe'surān || 42|| || iti śrīmadbhāgavatamahāpurāṇe pāramahaṃsyāṃ saṃhitāyāṃ ṣaṣṭhaskandhe nārāyaṇavarmakathanaṃ nāmāṣṭamo'dhyāyaḥ ||