Navagraha Stotram

॥ అథ నవగ్రహస్తోత్రమ్ ॥ ॥ రవిః ॥ జపాకుసుమసఙ్కాశం కాశ్యపేయం మహాద్యుతిమ్। తమోఽరిం సర్వపాపఘ్నం ప్రణతోఽస్మి దివాకరమ్॥౧॥ ॥ సోమః ॥ దధిశఙ్ఖతుషారాభం క్షీరోదార్ణవసమ్భవమ్। నమామి శశినం సోమం శమ్భోర్ముకుటభూషణమ్॥౨॥ ॥ మఙ్గలః ॥ ధరణీగర్భసమ్భూతం విద్యుత్కాన్తిసమప్రభమ్। కుమారం శక్తిహస్తం తం మఙ్గలం ప్రణమామ్యహమ్॥౩॥ ॥ బుధః ॥ ప్రియఙ్గుకలికాశ్యామం రూపేణాప్రతిమం బుధమ్। సౌమ్యం సౌమ్యగుణోపేతం తం బుధం ప్రణమామ్యహమ్॥౪॥ ॥ గురుః ॥ దేవానాం చ ఋషీణాం చ గురుం కాఞ్చనసన్నిభమ్। బుద్ధిభూతం త్రిలోకేశం తం నమామి బృహస్పతిమ్॥౫॥ ॥ శుక్రః ॥ హిమకున్దమృణాలాభం దైత్యానాం పరమం గురుమ్। సర్వశాస్త్రప్రవక్తారం భార్గవం ప్రణమామ్యహమ్॥౬॥ ॥ శనిః ॥ నీలాఞ్జనసమాభాసం రవిపుత్రం యమాగ్రజమ్। ఛాయామార్తణ్డసమ్భూతం తం నమామి శనైశ్చరమ్॥౭॥ ॥ రాహుః ॥ అర్ధకాయం మహావీర్యం చన్ద్రాదిత్యవిమర్దనమ్। సింహికాగర్భసంభూతం తం రాహుం ప్రణమామ్యహమ్॥౮॥ ॥ కేతుః ॥ పలాశపుష్పసఙ్కాశం తారకాగ్రహమస్తకమ్। రౌద్రం రౌద్రాత్మకం ఘోరం తం కేతుం ప్రణమామ్యహమ్॥౯॥ ॥ ఫలశ్రుతిః ॥ ఇతి వ్యాసముఖోద్గీతం యః పఠేత్సుసమాహితః। దివా వా యది వా రాత్రౌ విఘ్నశాన్తిర్భవిష్యతి॥ నరనారీనృపాణాం చ భవేద్దుఃస్వప్ననాశనమ్। ఐశ్వర్యమతులం తేషామారోగ్యం పుష్టివర్ధనమ్॥ గ్రహనక్షత్రజాః పీడాస్తస్కరాగ్నిసముద్భవాః। తాః సర్వాః ప్రశమం యాన్తి వ్యాసో బ్రూతే న సంశయః॥ ॥ ఇతి శ్రీవ్యాసవిరచితమ్ ఆదిత్యాదినవగ్రహస్తోత్రం సమ్పూర్ణమ్ ॥ ॥ అథ నవగ్రహపీడాహరస్తోత్రమ్ ॥ ॥ రవిః ॥ గ్రహాణామాదిరాదిత్యో లోకరక్షణకారకః। విషమస్థానసమ్భూతాం పీడాం హరతు మే రవిః॥౧॥ ॥ సోమః ॥ రోహిణీశః సుధామూర్తిః సుధాగాత్రః సుధాశనః। విషమస్థానసమ్భూతాం పీడాం హరతు మే విధుః॥౨॥ ॥ మఙ్గలః ॥ భూమిపుత్రో మహాతేజా జగతాం భయకృత్సదా। వృష్టికృద్దృష్టిహర్తా చ పీడాం హరతు మే కుజః॥౩॥ ॥ బుధః ॥ ఉత్పాతరూపో జగతాం చన్ద్రపుత్రో మహాద్యుతిః। సూర్యప్రియకరో విద్వాన్ పీడాం హరతు మే బుధః॥౪॥ ॥ గురుః ॥ దేవమన్త్రీ విశాలాక్షః సదా లోకహితే రతః। అనేకశిష్యసమ్పూర్ణః పీడాం హరతు మే గురుః॥౫॥ ॥ శుక్రః ॥ దైత్యమన్త్రీ గురుస్తేషాం ప్రాణదశ్చ మహామతిః। ప్రభుస్తారాగ్రహాణాం చ పీడాం హరతు మే భృగుః॥౬॥ ॥ శనిః ॥ సూర్యపుత్రో దీర్ఘదేహో విశాలాక్షః శివప్రియః। దీర్ఘాచారః ప్రసన్నాత్మా పీడాం హరతు మే శనిః॥౭॥ ॥ రాహుః ॥ అనేకరూపవర్ణేశ్చ శతశోఽథ సహస్రదృక్। ఉత్పాతరూపో జగతాం పీడాం హరతు మే తమః॥౮॥ ॥ కేతుః ॥ మహాశిరా మహావక్త్రో దీర్ఘదంష్ట్రో మహాబలః। అతనుశ్చోర్ధ్వకేశశ్చ పీడాం హరతు మే శిఖీః॥౯॥ ॥ ఇతి బ్రహ్మాణ్డపురాణోక్తం నవగ్రహపీడాహరస్తోత్రం సమ్పూర్ణమ్ ॥ —