Vedasara Shiva Stotram

॥ వేదసారశివస్తోత్రమ్ ॥ ॥ శ్రీః ॥ ॥ అథ వేదసారశివస్తోత్రమ్ ॥ పశూనాం పతిం పాపనాశం పరేశం గజేన్ద్రస్య కృత్తిం వసానం వరేణ్యమ్ । జటాజూటమధ్యే స్ఫురద్గాఙ్గవారిం మహాదేవమేకం స్మరామి స్మరారిమ్ ॥ ౧ ॥ మహేశం సురేశం సురారాతినాశం విభుం విశ్వనాథం విభూత్యఙ్గభూషమ్ । విరూపాక్షమిన్ద్వర్కవహ్నిత్రినేత్రం సదానన్దమీడే ప్రభుం పఞ్చవక్త్రమ్ ॥ ౨ ॥ గిరీశం గణేశం గలే నీలవర్ణం గవేన్ద్రాధిరూఢం గుణాతీతరూపమ్ । భవం భాస్వరం భస్మనా భూషితాఙ్గం భవానీకలత్రం భజే పఞ్చవక్త్రమ్ ॥ ౩ ॥ శివాకాన్త శంభో శశాఙ్కార్ధమౌలే మహేశాన శూలిఞ్జటాజూటధారిన్ । త్వమేకో జగద్వ్యాపకో విశ్వరూపః ప్రసీద ప్రసీద ప్రభో పూర్ణరూప ॥ ౪ ॥ పరాత్మానమేకం జగద్బీజమాద్యం నిరీహం నిరాకారమోంకారవేద్యమ్ । యతో జాయతే పాల్యతే యేన విశ్వం తమీశం భజే లీయతే యత్ర విశ్వమ్ ॥ ౫ ॥ న భూమిర్నం చాపో న వహ్నిర్న వాయు- ర్న చాకాశమాస్తే న తన్ద్రా న నిద్రా । న చోష్ణం న శీతం న దేశో న వేషో న యస్యాస్తి మూర్తిస్త్రిమూర్తిం తమీడే ॥ ౬ ॥ అజం శాశ్వతం కారణం కారణానాం శివం కేవలం భాసకం భాసకానామ్ । తురీయం తమఃపారమాద్యన్తహీనం ప్రపద్యే పరం పావనం ద్వైతహీనమ్ ॥ ౭ ॥ నమస్తే నమస్తే విభో విశ్వమూర్తే నమస్తే నమస్తే చిదానన్దమూర్తే । నమస్తే నమస్తే తపోయోగగమ్య నమస్తే నమస్తే శ్రుతిజ్ఞానగమ్య ॥ ౮ ॥ ప్రభో శూలపాణే విభో విశ్వనాథ మహాదేవ శంభో మహేశ త్రినేత్ర । శివాకాన్త శాన్త స్మరారే పురారే త్వదన్యో వరేణ్యో న మాన్యో న గణ్యః ॥ ౯ ॥ శంభో మహేశ కరుణామయ శూలపాణే గౌరీపతే పశుపతే పశుపాశనాశిన్ । కాశీపతే కరుణయా జగదేతదేక- స్త్వంహంసి పాసి విదధాసి మహేశ్వరోఽసి ॥ ౧౦ ॥ త్వత్తో జగద్భవతి దేవ భవ స్మరారే త్వయ్యేవ తిష్ఠతి జగన్మృడ విశ్వనాథ । త్వయ్యేవ గచ్ఛతి లయం జగదేతదీశ లిఙ్గాత్మకే హర చరాచరవిశ్వరూపిన్ ॥ ౧౧ ॥ ఇతి శ్రీమత్పరమహంసపరివ్రాజకాచార్యస్య శ్రీగోవిన్దభగవత్పూజ్యపాదశిష్యస్య శ్రీమచ్ఛంకరభగవతః కృతౌ వేదసారశివస్తోత్రం సంపూర్ణమ్ ।