Devi Aparadha Kshamapana Stotram

అథ దేవ్యపరాధక్షమాపణస్తోత్రమ్ న మన్త్రం నో యన్త్రం తదపి చ న జానే స్తుతిమహో న చాహ్వానం ధ్యానం తదపి చ న జానే స్తుతికథాః । న జానే ముద్రాస్తే తదపి చ న జానే విలపనం పరం జానే మాతస్త్వదనుసరణం క్లేశహరణమ్ ॥౧॥ విధేరజ్ఞానేన ద్రవిణవిరహేణాలసతయా విధేయాశక్యత్వాత్తవ చరణయోర్యా చ్యుతిరభూత్ । తదేతత్ క్షన్తవ్యం జనని సకలోద్ధారిణి శివే కుపుత్రో జాయేత క్వచిదపి కుమాతా న భవతి ॥౨॥ పృథివ్యాం పుత్రాస్తే జనని బహవః సన్తి సరలాః పరం తేషాం మధ్యే విరలతరలోఽహం తవ సుతః । మదీయోఽయం త్యాగః సముచితమిదం నో తవ శివే కుపుత్రో జాయేత క్వచిదపి కుమాతా న భవతి ॥౩॥ జగన్మాతర్మాతస్తవ చరణసేవా న రచితా న వా దత్తం దేవి ద్రవిణమపి భూయస్తవ మయా । తథాపి త్వం స్నేహం మయి నిరుపమం యత్ప్రకురుషే కుపుత్రో జాయేత క్వచిదపి కుమాతా న భవతి ॥౪॥ పరిత్యక్తా దేవా వివిధవిధసేవాకులతయా మయా పఞ్చాశీతేరధికమపనీతే తు వయసి । ఇదానీం చేన్మాతస్తవ యది కృపా నాపి భవితా నిరాలమ్బో లమ్బోదరజనని కం యామి శరణమ్ ॥౫॥ శ్వపాకో జల్పాకో భవతి మధుపాకోపమగిరా నిరాతఙ్కో రఙ్కో విహరతి చిరం కోటికనకైః । తవాపర్ణే కర్ణే విశతి మనువర్ణే ఫలమిదం జనః కో జానీతే జనని జపనీయం జపవిధౌ ॥౬॥ చితాభస్మాలేపో గరలమశనం దిక్పటధరో జటాధారీ కణ్ఠే భుజగపతిహారీ పశుపతిః । కపాలీ భూతేశో భజతి జగదీశైకపదవీం భవాని త్వత్పాణిగ్రహణపరిపాటీఫలమిదమ్ ॥౭॥ న మోక్షస్యాకాఙ్క్షా భవవిభవవాఞ్ఛాపి చ న మే న విజ్ఞానాపేక్షా శశిముఖి సుఖేచ్ఛాపి న పునః । అతస్త్వాం సంయాచే జనని జననం యాతు మమ వై మృడానీ రుద్రాణీ శివ శివ భవానీతి జపతః ॥౮॥ నారాధితాసి విధినా వివిధోపచారైః కిం రుక్షచిన్తనపరైర్న కృతం వచోభిః । శ్యామే త్వమేవ యది కిఞ్చన మయ్యనాథే ధత్సే కృపాముచితమమ్బ పరం తవైవ ॥౯॥ ఆపత్సు మగ్నః స్మరణం త్వదీయం కరోమి దుర్గే కరుణార్ణవేశి । నైతచ్ఛఠత్వం మమ భావయేథాః క్షుధాతృషార్తా జననీం స్మరన్తి ॥౧౦॥ జగదమ్బ విచిత్రమత్ర కిం పరిపూర్ణా కరుణాస్తి చేన్మయి । అపరాధపరమ్పరాపరం న హి మాతా సముపేక్షతే సుతమ్ ॥౧౧॥ మత్సమః పాతకీ నాస్తి పాపఘ్నీ త్వత్సమా న హి । ఏవం జ్ఞాత్వా మహాదేవి యథాయోగ్యం తథా కురు ॥౧౨॥ ఇతి శ్రీశఙ్కరాచార్యవిరచితం దేవ్యపరాధక్షమాపనస్తోత్రం సమ్పూర్ణమ్ ।