Devi Atharvashirsha

ఓం సర్వే వై దేవా దేవీముపతస్థుః కాసి త్వం మహాదేవీతి ।।౧।। సాబ్రవీత్ - అహం బ్రహ్మస్వరూపిణీ । మత్తః ప్రకృతిపురుషాత్మకం జగత్ । శూన్యం చాశూన్యం చ ।।౨।। అహమానన్దానానన్దౌ । అహం విజ్ఞానావిజ్ఞానే । అహం బ్రహ్మాబ్రహ్మణీ వేదితవ్యే । అహం పఞ్చభూతాన్యపఞ్చభూతాని । అహమఖిలం జగత్ ।।౩।। వేదోఽహమవేదోఽహమ్ । విద్యాహమవిద్యాహమ్ । అజాహమనజాహమ్ । అధశ్చోర్ధ్వం చ తిర్యక్ చాహమ్ ।।౪।। అహం రుద్రేభిర్వసుభిశ్చరామి । అహమాదిత్యైరుత విశ్వేదేవైః । అహం మిత్రావరుణావుభౌ బిభర్మి । అహమిన్ద్రాగ్నీ అహమశ్వినావుభౌ ।।౫।। అహం సోమం త్వష్టారం పూషణం భగం దధామి । అహం విష్ణుమురుక్రమం బ్రహ్మాణముత ప్రజాపతిం దధామి ।।౬।। అహం దధామి ద్రవిణం హవిష్మతే సుప్రావ్యే యజమానాయ సున్వతే । అహం రాష్ట్రీ సఙ్మనీ వసూనాం చికితుషీ ప్రథమా యజ్ఞియానామ్ । అహం సువే పితరమస్య మూర్ధన్మమ యోనిరప్స్వన్తః సముద్రే । య ఏవం వేద స దైవీం సమ్పదమాప్నోతి ।।౭।। తే దేవా అబ్రువన్ – నమో దేవ్యై మహాదేవ్యై శివాయై సతతం నమః । నమః ప్రకృత్యై భద్రాయై నియతాః ప్రణతాః స్మ తామ్ ।।౮।। తామగ్నివర్ణాం తపసా జ్వలన్తీం వైరోచనీం కర్మఫలేషు జుష్టామ్ । దుర్గాం దేవీం శరణం ప్రపద్యామహేఽసురాన్నాశయిత్ర్యై తే నమః ।।౯।। దేవీం వాచమజనయన్త దేవాస్తాం విశ్వరూపాః పశవో వదన్తి । సా నో మన్ద్రేషమూర్జం దుహానా ధేనుర్వాగస్మానుప సుష్టుతైతు ।।౧౦।। కాలరాత్రీం బ్రహ్మస్తుతాం వైష్ణవీం స్కన్దమాతరమ్ । సరస్వతీమదితిం దక్షదుహితరం నమామః పావనాం శివామ్ ।।౧౧।। మహాలక్ష్మ్యై చ విద్మహే సర్వశక్త్యై చ ధీమహి । తన్నో దేవీ ప్రచోదయాత్ ।।౧౨।। అదితిర్హ్యజనిష్ట దక్ష యా దుహితా తవ । తాం దేవా అన్వజాయన్త భద్రా అమృతబన్ధవః ।।౧౩।। కామో యోనిః కమలా వజ్రపాణిర్గుహా హసా మాతరిశ్వాభ్రమిన్ద్రః । పునర్గుహా సకలా మాయయా చ పురూచ్యైషా విశ్వమాతాదివిద్యోమ్ ।।౧౪।। ఏషాఽఽత్మశక్తిః । ఏషా విశ్వమోహినీ । పాశాఙ్కుశధనుర్బాణధరా । ఏషా శ్రీమహావిద్యా । య ఏవం వేద స శోకం తరతి ।।౧౫।। నమస్తే అస్తు భగవతి మాతరస్మాన్ పాహి సర్వతః ।।౧౬।। సైషాష్టౌ వసవః । సైషైకాదశ రుద్రాః । సైషా ద్వాదశాదిత్యాః । సైషా విశ్వేదేవాః సోమపా అసోమపాశ్చ । సైషా యాతుధానా అసురా రక్షాంసి పిశాచా యక్షాః సిద్ధాః । సైషా సత్త్వరజస్తమాంసి । సైషా బ్రహ్మవిష్ణురుద్రరూపిణీ । సైషా ప్రజాపతీన్ద్రమనవః । సైషా గ్రహనక్షత్రజ్యోతీంసి । కలాకాష్ఠాదికాలరూపిణీ । తామహం ప్రణౌమి నిత్యమ్ ।। పాపాపహారిణీం దేవీం భుక్తిముక్తిప్రదాయినీమ్ । అనన్తాం విజయాం శుద్ధాం శరణ్యాం శివదాం శివామ్ ।।౧౭।। వియదీకారసంయుక్తం వీతిహోత్రసమన్వితమ్ । అర్ధేన్దులసితం దేవ్యా బీజం సర్వార్థసాధనమ్ ।।౧౮।। ఏవమేకాక్షరం బ్రహ్మ యతయః శుద్ధచేతసః । ధ్యాయన్తి పరమానన్దమయా జ్ఞానామ్బురాశయః ।।౧౯।। వాఙ్మాయా బ్రహ్మసూస్తస్మాత్ షష్ఠం వక్త్రసమన్వితమ్ । సూర్యోఽవామశ్రోత్రబిన్దుసంయుక్తష్టాత్తృతీయకః । నారాయణేన సంమిశ్రో వాయుశ్చాధరయుక్ తతః । విచ్చే నవార్ణకోఽర్ణః స్యాన్మహదానన్దదాయకః ।।౨౦।। హృత్పుణ్డరీకమధ్యస్థాం ప్రాతః సూర్యసమప్రభామ్ । పాశాఙ్కుశధరాం సౌమ్యాం వరదాభయహస్తకామ్ । త్రినేత్రాం రక్తవసనాం భక్తకామదుఘాం భజే ।।౨౧।। నమామి త్వాం మహాదేవీం మహాభయవినాశినీమ్ । మహాదుర్గప్రశమనీం మహాకారుణ్యరూపిణీమ్ ।।౨౨।। యస్యాః స్వరూపం బ్రహ్మాదయో న జానన్తి తస్మాదుచ్యతే అజ్ఞేయా । యస్యా అన్తో న లభ్యతే తస్మాదుచ్యతే అనన్తా । యస్యా లక్ష్యం నోపలక్ష్యతే తస్మాదుచ్యతే అలక్ష్యా । యస్యా జననం నోపలభ్యతే తస్మాదుచ్యతే అజా । ఏకైవ సర్వత్ర వర్తతే తస్మాదుచ్యతే ఏకా । ఏకైవ విశ్వరూపిణీ తస్మాదుచ్యతే నైకా । అతఏవోచ్యతే అజ్ఞేయానన్తాలక్ష్యాజైకా నైకేతి ।।౨౩।। మన్త్రాణాం మాతృకా దేవీ శబ్దానాం జ్ఞానరూపిణీ । జ్ఞానానాం చిన్మయాతీతా శూన్యానాం శూన్యసాక్షిణీ । యస్యాః పరతరం నాస్తి సైషా దుర్గా ప్రకీర్తితా ।।౨౪।। తాం దుర్గాం దుర్గమాం దేవీం దురాచారవిఘాతినీమ్ । నమామి భవభీతోఽహం సంసారార్ణవతారిణీమ్ ।।౨౫।। ఇదమథర్వశీర్షం యోఽధీతే స పఞ్చాథర్వశీర్షజపఫలమాప్నోతి । ఇదమథర్వశీర్షమజ్ఞాత్వా యోఽర్చాం స్థాపయతి - శతలక్షం ప్రజప్త్వాపి సోఽర్చాసిద్ధిం న విన్దతి । శతమష్టోత్తరం చాస్య పురశ్చర్యావిధిః స్మృతః । దశవారం పఠేద్ యస్తు సద్యః పాపైః ప్రముచ్యతే । మహాదుర్గాణి తరతి మహాదేవ్యాః ప్రసాదతః ।।౨౬।। సాయమధీయానో దివసకృతం పాపం నాశయతి । ప్రాతరధీయానో రాత్రికృతం పాపం నాశయతి । సాయం ప్రాతః ప్రయుఞ్జానో అపాపో భవతి । నిశీథే తురీయసన్ధ్యాయాం జప్త్వా వాక్సిద్ధిర్భవతి । నూతనాయాం ప్రతిమాయాం జప్త్వా దేవతాసాన్నిధ్యం భవతి । ప్రాణప్రతిష్ఠాయాం జప్త్వా ప్రాణానాం ప్రతిష్ఠా భవతి । భౌమాశ్విన్యాం మహాదేవీసన్నిధౌ జప్త్వా మహామృత్యుం తరతి । స మహామృత్యుం తరతి య ఏవం వేద । ఇత్యుపనిషత్ ।।