GANESHA · STOTRAM

Ganesha Kavacham

శ్రీగణేశకవచమ్

Ganesha Kavacham is a traditional Ganesha devotional reading. This page presents the full text of the linked Wikisource edition, with Telugu and IAST transliterations.

తెలుగు देवनागरी English (IAST)

śrīgaṇeśāya namaḥ .. gauryuvāca . eṣo'ticapalo daityānbālye'pi nāśayatyaho . agre kiṃ karma karteti na jāne munisattama .. 1.. daityā nānāvidhā duṣṭāḥ sādhudevadruhaḥ khalāḥ . ato'sya kaṇṭhe kiṃcittvaṃ rakṣārthaṃ baddhumarhasi .. 2.. muniruvāca . dhyāyetsiṃhahataṃ vināyakamamuṃ digbāhumādye yuge tretāyāṃ tu mayūravāhanamamuṃ paṅbāhukaṃ siddhidam . dvāpāre tu gajānanaṃ yugabhujaṃ raktāṅgarāgaṃ vibhum turye tu dvibhujaṃ sitāṅgaruciraṃ sarvārthadaṃ sarvadā .. 3.. vināyakaḥ śikhāṃ pātu paramātmā parātparaḥ . atisundarakāyastu mastakaṃ sumahotkaṭaḥ .. 4.. lalāṭaṃ kaśyapaḥ pātu bhṛyugaṃ tu mahodara . nayane bhālacandrastu gajāsyastvoṣṭhapallavau .. 5.. jihvāṃ pātu gaṇakrīḍaścibukaṃ girijāsutaḥ . vācaṃ vināyakaḥ pātu dantān rakṣatu vighnahā .. 6.. śravaṇau pāśapāṇistu nāsikāṃ cintitārthadaḥ . gaṇeśastu mukhaṃ kaṇṭhaṃ pātu devo gaṇañjajayaḥ .. 7.. skandhau pātu gajaskandhaḥ stanau vighnavināśanaḥ . hṛdayaṃ gaṇanāthastu heraṃbo jaṭharaṃ mahān .. 8.. dharādharaḥ pātu pārśvau pṛṣṭhaṃ vighnaharaḥ śubhaḥ . liṅgaṃ guhyaṃ sadā pātu vakratuṇḍo mahābalaḥ .. 9.. gaṇakrīḍo jānusaṅghe urū maṅgalamūrtimān . ekadanto mahābuddhiḥ pādau gulphau sadā'vatu .. 10.. kṣipraprasādano bāhū pāṇī āśāprapūrakaḥ . aṅgulīśca nakhānpātu padmahaso'rināśanaḥ .. 11.. sarvāṅgāni mayūreśo viśvavyāpī sadā'vatu . anuktamapi yatsthānaṃ dhūmraketuḥ sadā'vatu .. 12.. āmodastvagrataḥ pātu pramodaḥ pṛṣṭhato'vatu . prācyāṃ rakṣatu buddhīśa āgneyāṃ siddhidāyakaḥ ..13.. dakṣiṇāsyāmumāputro nairṛtyāṃ tu gaṇeśvaraḥ . pratīcyāṃ vighnahartā'vyādvāyavyāṃ gajakarṇakaḥ .. 14.. kauberyāṃ nidhipaḥ pāyādīśānyāmīśanandanaḥ . divā'vyādekadantastu rātrau sandhyāsu vighnahṛt .. 15.. rākṣasāsuravetālagrahabhūtapiśācataḥ . pāśāṅkuśadharaḥ pātu rajaḥsattvatamaḥ smṛtiḥ .. 16.. jñānaṃ dharmaṃ ca lakṣmīṃ ca lajjāṃ kīrti tathā kulam . vapurdhanaṃ ca dhānyaṃ ca gṛhāndārānsutānsakhīn .. 17.. sarvāyudhadharaḥ pautrān mayūreśo'vatātsadā . kapilo'jādikaṃ pātu gajāśvānvikaṭo'vatu .. 18.. bhūrjapatre likhitvedaṃ yaḥ kaṇṭhe dhārayetsudhīḥ . na bhayaṃ jāyate tasya yakṣarakṣaḥpiśācataḥ .. 18.. trisandhyaṃ japate yastu vajrasāratanurbhavet . yātrākāle paṭhedyastu nirvighnena phalaṃ labhet .. 20.. yuddhakāle paṭhedyastu vijayaṃ cāpnuyāddrutam . māraṇoccāṭakarṣastambhamohanakarmaṇi .. 21.. saptavāraṃ japedetaddinānāmekaviṃśatim . tattatphalavāpnoti sādhako nātrasaṃśayaḥ ..22.. ekaviṃśativāraṃ ca paṭhettāvaddināni yaḥ . kārāgṛhagataṃ sadyorājñā vadhyaṃ ca mocayet .. 23.. rājadarśanavelāyāṃ paṭhedetattrivārataḥ . sa rājasaṃ vaśaṃ nītvā prakṛtīśca sabhāṃ jayet .. 24.. idaṃ gaṇeśakavacaṃ kaśyapena samīritam . mudgalāya ca tenātha māṇḍavyāya maharṣaye .. 25.. mahyaṃ sa prāha kṛpayā kavacaṃ sarvasiddhidam . na deyaṃ bhaktihīnāya deyaṃ śraddhāvate śubham .. 26.. yasyānena kṛtā rakṣā na bādhāsya bhavetkvacit . rākṣasāsuravetāladaityadānavasambhavā .. 27.. iti śrīgaṇeśapurāṇe uttarakhaṇḍe bālakrīḍāyāṃ ṣaḍaśītitame'dhyāye gaṇeśakavacaṃ sampūrṇam

Reading & reflection

Ganesha hymns are often read at the beginning of a new undertaking. Settle your attention before reciting, and allow a brief pause at the end of each verse.

Text edition & attribution

Complete text of श्रीगणेशकवचम् on Sanskrit Wikisource, revision 38086, contributed by Wikisource editors. Text and generated transliterations are shared under CC BY-SA 4.0.

Changes: interface material removed, spacing normalized, and Telugu and IAST transliterations generated. The source may contain transcription variants; automated transliterations have not been independently proofread. No source verses have been intentionally shortened.